ថៃ៖ នាយករដ្ឋមន្រ្តីថៃ លោក ស្រេតថា ថាវីស៊ីន (Srettha Thavisin) បានឱ្យដឹងនៅល្ងាចថ្ងៃសៅរិ៍ម្សិលមិញនេះថា អតីតនាយករដ្ឋមន្រ្តីថៃ លោក ថាក់ស៊ីន ស៊ីណាវ៉ាត់ត្រា (Thaksin Shinawatra) មានភាពរីករាយ និងអារម្មណ៍ល្អប្រសើរ បើទោះបីជាសុខភាពរបស់លោកនៅមិនទានរឹងមាំ ក្រោយដោះលែងពីការឃុំឃាំងក្នុងមន្ទីរពេទ្យកាលពីពេលថ្មីៗនេះ។

លោក ថាក់ស៊ីន ដែលមានវ័យ ៧៤ឆ្នាំ ត្រូវបានដោះលែងឱ្យមានសេរីភាពឡើងវិញកាលពីថ្ងៃទី១៨ ខែកុម្ភៈកន្លងទៅ ក្រោយលោកបានវិលត្រឡប់ចូលប្រទេសថៃឡើងវិញក្រោយការនិរទេសខ្លួនអស់រយៈពេលជាង ១៥ឆ្នាំបន្ទាប់មានមានរដ្ឋប្រហារយោធាទម្លាក់លោកចេញពីតំណែង ខណៈការត្រឡប់មកកាន់មាតុភូមិឡើងវិញនេះ លោក ថាក់ស៊ីន បានជាប់ពន្ធនាគារអស់រយៈពេលជាង ៦ខែ។ គួរបញ្ជាក់ថា បច្ចុប្បន្ននេះគណបក្សភឿថៃដែលកំពុងដឹកនាំដោយកូនស្រីរបស់លោកនោះ កំពុងស្ថិតក្នុងការកាន់អំណាចសាជាថ្មី ក្រោយការបោះឆ្នោតជាតិរបស់ថៃ។ 

លោក ស្រេតថា ថាវីស៊ីន បានថ្លែងប្រាប់ក្រុមអ្នកសារព័ត៌មានថា៖ "គ្មានអ្វីដែលត្រូវនិយាយច្រើននោះទេ! គាត់ (លោក ថាក់ស៊ីន) នៅតែមានស្ថានភាពសុខភាពទន់ខ្សោយ ប៉ុន្តែអាចកម្រើកដៃបានបន្តិចបន្តួច"។ យ៉ាងណាក្ដី នាយករដ្ឋមន្រ្តីថៃរូបនេះបញ្ជាក់ថា លោកថាក់ស៊ីនពិតជាមានអារម្មណ៍ល្អ និងមានភាពរីករាយដែលអាចត្រឡប់ទៅគេហដ្ឋានវិញ។ 

គួរបញ្ជាក់ថា ក្រោយការវិលត្រឡប់ចូលប្រទេសឡើងវិញ លោក ថាក់ស៊ីន ប្រឈមនឹងការជាប់ពន្ធនាគាររយៈពេលវែងក្រោមបទចោទប្រកាន់ពីបទពុករលួយ និងការរំលោភបំពានអំណាច។ ក្រោយការកាត់ទោសឱ្យជាប់ពន្ធនាគារ លោក ថាក់ស៊ីន ត្រូវបានគេបញ្ជូនទៅឃុំឃាំងនៅមន្ទីរពេទ្យប្រណិតមួយកន្លែង ដែលក្រុមគ្រូពេទ្យបានអះអាងថា សុខភាពរបស់គាត់ចុះខ្សោយដោយសារបញ្ហាជំងឺលើសឈាម និងអាការៈតឹងណែន និងថប់ទ្រូង។ គួរបញ្ជាក់ថា លោក ថាក់ស៊ីន ត្រូវបានទទួលការប្រោសព្រះរាជទានបន្ធូរបន្ថយទោសពីព្រះមហាក្សត្រថៃ ពីទោសពន្ធនាគារ ៨ឆ្នាំ មកនៅត្រឹម ១ឆ្នាំ និងត្រូវអនុវត្តទោសក្នុងពន្ធនាគារពាក់កណ្ដាល (ស្មើនឹង ៦ខែ) ប៉ុណ្ណោះ៕